Претседателот на САД, Доналд Трамп, објави дека воведува нова царина од 50 проценти за целиот бакар увезен во Соединетите Американски Држави. Сепак, сè уште не е јасно кога мерката ќе стапи на сила.
– Денес воведуваме царина за бакар – рече Трамп на состанокот на кабинетот, додавајќи дека верува дека стапката ќе биде 50 проценти.
Ова би била четвртата општа царина што ја вовел Трамп за време на неговиот втор мандат. Во моментов, повеќето увезени автомобили и автоделови подлежат на царина од 25 проценти, додека челикот и алуминиумот се увезуваат со царина од 50 проценти.
Белата куќа не одговори веднаш на прашањето на CNN за тоа кога ќе стапат во сила царините за бакар.
Во февруари, Трамп нареди истрага за увозот на бакар според член 232 од законот, што му дава на претседателот овластување да воведува повисоки царини од причини поврзани со националната безбедност.
Бакарот е клучна суровина во производството на електроника, машини и автомобили. Царините за бакар би можеле да доведат до повисоки цени на овие производи за американските потрошувачи. Според Министерството за трговија на САД, минатата година е увезен бакар во вредност од 17 милијарди долари, а најголем странски снабдувач бил Чиле, со извоз во вредност од 6 милијарди долари.
