Не сакаме да ве плашиме, но не е баш безопасно.
Тинејџерите кои подлегнуваат на притисокот од врсниците и почнуваат да пушат веројатно го прават тоа затоа што имаат помалку сива материја во делот од мозокот што влијае на донесувањето одлуки и следењето на правилата, а тинејџерите кои развиваат навика за пушење имаат тенденција да доживеат намалување на сивата маса во делот од мозокот до крајот на нивните тинејџерски години кој го контролира управувањето со задоволството.
Имено, ова произлегува од студијата за влијанието на пушењето врз адолесцентите и младите во Велика Британија, Франција, Германија и Ирска, која ја спровеле универзитетите во Кембриџ, Фудан и Ворвик, додека резултатите се објавени во списанието „Nature Communications“.
По споредувањето на резултатите од снимањето на мозокот на учесниците кои почнале да пушат на возраст од 14 години со оние кои не пушеле, и ја повториле постапката за истите учесници на возраст од 19 и 23 години, тие откриле дека „во просек, тинејџерите кои почнале да пушат на возраст од 14 години имале значително помалку сива материја во делот на левиот фронтален лобус кој е поврзан со одлучување и кршење на правилата“.
Сивата материја, ткивото кое ги обработува информациите и ги содржи сите неврони на органот, го доживува својот врв на раст пред адолесценцијата, иако целокупниот развој на мозокот продолжува до зрелоста.
Тимот научници исто така откри дека луѓето кои почнале да пушат на 14-годишна возраст имале „губење на сивата материја во десниот префронтален кортекс“, кој исто така е дел од мозокот поврзан со обилно пиење и злоупотреба на марихуана.
„Помалку сива материја во овој регион на мозокот може да ја ограничи когнитивната функција, што доведува до помала самоконтрола и склоност кон ризично однесување, како што е пушењето“, вели Барбара Сахакијан од Катедрата за психијатрија на Универзитетот во Кембриџ.
