Германија долго време има корист од ерата на евтини пари што поттикна децениски бум на недвижностите, но секторот сега се соочува со голем пресврт.
Во најновите знаци на стрес во секторот, најголемата германска групација за недвижности „Vonovia“ известува за загуби и отпишувања од повеќе милијарди евра, а растот на работните места за градежните работници е запрен, објави „Reuters“, наведувајќи неколку клучни прашања поврзани со развојот на кризата во сектор во економијата број 1 во Европа:
Зошто е важна Германија?
Слабост во секторот на недвижности беше забележана и во САД и Шведска, но Германија е важна бидејќи е најголемата европска економија и најголемиот пазар за инвестиции во недвижности на континентот. Според Германската федерација за недвижности, секторот сочинува приближно една петтина од економското производство и создава едно од десет работни места во земјата.
Колку е лоша ситуацијата?
Во првата половина од годината, новите градби во Германија паднаа нагло за 47 отсто во однос на просекот од изминатите две години, а дозволите за нови градби паднаа за 27 отсто во првите пет месеци.
Цените на куќите, исто така, паднаа во првиот квартал најмногу откако германската канцеларија за статистика почна да собира податоци, што е пад од 6,8 отсто во однос на претходната година.
Во септември податоците ќе покажат колку се одржува трендот и ќе ја расветлат состојбата со работните места во градежништвото, посочува и новинската агенција.
„Сегашната криза сигурно ќе продолжи уште некое време“, рече Свен Карстенсен, извршен директор на „Bulwiengesa“, компанија за консултации и анализи за недвижнини.
Што се крие зад кризата?
Главниот фактор е ненадејниот и брз пораст на каматните стапки од страна на Европската централна банка, која се бори со највисоките нивоа на инфлација во последните неколку децении, но има и нешто друго – трошоците за изградба исто така растат, а побарувачката за канцелариски и малопродажен простор опаѓање по пандемијата.
Војната во Украина, исто така, помага германските недвижности да изгледаат поризични за странските инвеститори.
„Ако сте инвеститор од Блискиот Исток, Германија изгледа доста блиску до Украина. Тие велат: „Сакам да ги насочам моите пари во САД и Азија, а не во Германија“, вели Флоријан Швалм, консултант во „EY“.
Што е следно?
Германија, чие население во последно време се зголемува, бидејќи милиони мигранти и бегалци од Украина се влеваат во земјата, има за цел да гради 400.000 станови годишно, но се бори да ја исполни таа цел. Затоа на 25-ти септември е закажана средба на сите заинтересирани со канцеларот на земјава Олаф Шолц на која ќе се бараат решенија.
