Богатството на супербогатите во Кина падна најмногу во повеќе од две децении оваа година во услови на руско-украинска војна, мерките на Пекинг за нула Ковид и падот на берзите во Хонг Конг, стои во годишното рангирање на најбогатите луѓе во земјата, објавено во вторникот и цитирано од „Reuters“.
Рангирањето на магазинот „Hurun“, кое ги рангира најбогатите луѓе во Кина со минимално нето богатство од 5 милијарди јуани (692 милиони долари), покажува дека само 1.305 луѓе го преминале прагот оваа година, што е за 11 отсто помалку од 2021-ва година. Вкупното нивното богатство достигна 3,5 трилиони долари, што исто така е пад од 18 отсто.
Во исто време, бројот на луѓе со богатство од 10 милијарди долари е намален за 29 луѓе на 56 лица, а бројот на милијардери во долари се намалил за 239 луѓе на 946 лица во оваа година, пишува и магазинот.
„Оваа година го означува најголемиот пад на рангирањето на „Hurun China Rich“ во последните 24 години“, рече Руперт Хугеверф, претседател и главен истражувач на аналитичката компанија „Hurun Report“, која го составува рангирањето.
Изгледите за глобалната економија оваа година беа силно погодени од војната во Украина и забавувањето на економскиот раст во Кина, што пак беше влошено од ултра строгите политики на земјата за коронавирусот и продолжениот пад на пазарот за недвижнини.
Две години регулаторни ограничувања што ги погодија најголемите кинески технолошки имиња како што се „Alibaba Group“ и „Tencent Holdings“ и загриженоста дека претседателот Си Џинпинг ќе го жртвува растот за идеологија во неговиот трет мандат, исто така тежат врз довербата на инвеститорите, бидејќи берзите во Хонг Конг и на копното забележаа пад во последните недели.
Јанг Хујанг, бизнисменката зад „Country Garden Holdings“, која како и многу други кинески градежни компании се бори со проблеми со долгот, загуби 15,7 милијарди долари, што е најголем пад на рангирањето во 2022-ра година.
Џун Шаншан, чии котирани компании ја вклучуваат компанијата за флаширање вода „Nongfu Spring“ и развивачот на вакцини „Beijing Wantai Biological Pharmacy Enterprise“, се на врвот на листата втора година по ред со раст од 17% на богатството на 65 милијарди долари.
Основачот на „TikTok“ и сопственик на „ByteDance“, Џанг Јимин е на второто место, но неговото богатство падна за 28% на 35 милијарди долари поради падот на вреднувањето на „ByteDance“. На третото место е Зенг Јукун, претседател на батерискиот гигант „CATL“.
Основачот на „Tencent“, Пони Ма, го објави вториот најголем пад на богатството од 14,6 милијарди долари поради пониските цени на технолошките акции. Тој го зазема петтото место во рангирањето. Основачот на „Alibaba“ Џек Ма и неговото семејство паднаа за четири позиции на деветтото место во оваа година.
