Мапата на глобалното производство на зелена енергија за иднината се исцртува, при што САД поставуваат значаен репер, пишува за „Financial Times“, Сорен Скоу, извршен директор на „AP Moller-Maersk“.
Во услови на енергетска криза влошена со инвазијата на Украина, Законот за намалување на инфлацијата (IRA) на претседателот Џо Бајден вклучува 369 милијарди американски долари финансирање за климата и енергијата што ја менува играта, покрај 110 милијарди долари веќе наменети за климатски инвестиции од минатата година. Ова се очекува да отклучи повеќе од 1 трилион американски долари комбинирани инвестиции поврзани со климата.
Со „IRA“, Американците се ставија во првите редови на трката да бидат светски лидер во производството на зелена енергија и го дадоа на транзицијата кон обновливите извори на енергија потребниот поттик. Законодавството не е совршено во секој детал, но како што велат во НАСА: „Подобро е непријател на доволно добро“.
Со оглед на тешката задача пред нас, ова е начинот на размислување што ни треба. Немаме време да чекаме се да биде совршено.
Зголемувањето на производството на зелена енергија и неговата конкурентна цена е сериозен предизвик. Со обезбедување атрактивни деловни услови за приватни и јавни партнерства, „IRA“ може да ни помогне да го решиме овој проблем преку големи инвестиции во целосен опсег на технологии со ниска потрошувачка на јаглерод. Анализата на „Boston Consulting Group“ покажува дека со револуционерните стимулации вклучени во законот, цената на соларната енергија би можела да се намали на половина, а цените на копнениот ветер би можеле да се намалат за повеќе од 60 отсто.
Во „AP Mоller-Maersk“ управуваме со повеќе од 700 големи контејнерски бродови и 68 контејнерски терминали, како и 3,2 милиони квадратни метри магацински простор. Секоја година транспортираме речиси 5 милиони контејнери со железница, камиони и шлепери. Ние трошиме големи количини на енергија и согоруваме речиси 12 милиони тони фосилни горива годишно само во нашите бродови.
Сепак, сакаме да бидеме климатски неутрални до 2040-та година и да постигнеме значително намалување на емисиите пред 2030-та година. Ова ќе бара целосно префрлување од фосилни на зелени горива.
За да се случи ова, потребен ни е пазар за зелено гориво како е-метанол. Потребен ни е пристап до голема количина на исплатлива обновлива енергија за да произведеме водород потребен за зелени горива и да обезбедиме цена на гориво што е привлечна за нашите клиенти. Потребна ни е и нова енергетска инфраструктура – каква што во моментов не постои. Така, кога ќе видиме знак „отворено за бизнис“ во САД, се интересираме.
Лидерите на индустријата мора да помогнат да се отвори патот напред. Бараме силни партнерства и можности за инвестирање за да го создадеме пазарот на потребното глобално ниво и потенцијално директно да се вклучиме во производството на обновливи извори на енергија како што се ветерот и сонцето за да ги произведеме нашите зелени горива.
Убеден сум дека зелените горива базирани на водород ќе достигнат размери во иднина и дека цените на крајот ќе паднат кога тоа ќе се случи. Американците ја поставија основата за тоа покажувајќи подготвеност да инвестираат во развој на атрактивна домашна почва за овој пазар, пред остатокот од светот.
Европа со години сакаше да мисли за себе како глобален лидер во борбата против климатските промени. Но, САД сега го презедоа водството.
Се надевам дека овој американски потег може да послужи како зелен катализатор за остатокот од светот. Замислете „зелена трка“ во која регионите и земјите меѓусебно се стимулираат да создадат најдобри услови за забрзана енергетска транзиција.
Се разбира, во трка некој ќе заврши прв, но на крајот сите ќе бидеме победници од глобалното политичко опкружување кое поттикнува побрзи одлуки, поттикнува зелени инвестиции и им овозможува на бизнисите да направат значајна енергетска транзиција. Резултатот ќе биде поголема иновација, производство во големи размери и изградба на инфраструктура за зелена енергија, која толку многу недостасува денес.
Акцијата против климатските промени и транзицијата од фосилните горива е глобален предизвик, но кој доаѓа и со глобални можности. Владата на САД испрати јасен сигнал со својата посветеност на партнерства со бизниси кои се подготвени да инвестираат во зелена иднина. Европа, Кина, Блискиот Исток, Индија и другите треба да го следат примерот со свои амбициозни инвестициски планови.
И покрај превирањата во светот во моментов, не смееме да заборавиме дека сме во климатска вонредна состојба и мора да дејствуваме сега за да постигнеме значителен напредок пред 2030-та година. САД го поканија остатокот од светот да се приклучи во трката за зелена иднина, но Добрата вест е дека има простор за повеќе од еден лидер. Ако сакаме да одиме далеку, мора да одиме заедно.
