Уморни од тоа чувство кое ви кажува дека работите многу напорно за недоволна плата, но сепак не сакате целосно да се откажете? Можеби решението е да се обидете „тивко да се откажете“. Се прашувате што значи ова? Доколку не сте налетале на вирално видеото од Тикток во кое корисник на мрежата зборува за ова, ќе ви објасниме. Накратко, тоа значи дека се откажувате од идејата да ги надминете сите ваши граници на работа и да дадете се од себе.
Авторот на видеото објаснува како забележува „Тивок отказ“, термин кој неодамна се појави во делот на интернетот кој го објавуваат, народски кажано, помладата генерација и кој во јавноста е наречен „економски Тикток тренд“.
„Сè уште ги извршувате своите должности, но повеќе не се потпишувате на идејата дека работата треба да биде вашиот живот“. Факт е дека не е“, вели тиктокерот кој направи видео кое досега го погледнале околу 3,5 милиони луѓе.
Инаку, „Тивок отказ“ е тренд кој се појави неодамна, а идејата е да се испрати порака до младите да не се грижат за работата, да престанат да преземаат дополнителни обврски надвор од описот на нивната работа или да престанат да работат прекувремено. Накратко, да престанат да ги прават сите работи за кои не се платени за да се избегне синдромот на исцрпеност.
„Burn out“ – догма на милениумците
Burnout, или „burn out“ не е ништо ново – овој термин е измислен пред неколку години и сè започна со милениумците. Синдромот на исцрпеност беше, и се уште е, нивна догма. Сепак, нивните помлади колеги, членови на генерацијата Z (во која спаѓаат и оние родени по 1996 година), се обидуваат да избегнат „прегорување“ со едноставно вршење на работата што се бара од нив. Токму ова е клучната точка на расправија меѓу менаџерите и помладите колеги, членовите на генерацијата Z и некои милениумци, која доаѓа во незгодниот момент на пандемијата на коронавирус.
На овој начин, припадниците на помладите генерации на работоспособна возраст, сакаат да ја претворат „напорната работа“ во одамна заборавен спомен, резервиран за бумери и делумно за милениумци.
Доказ за незадоволството на генерацијата Z
Има многу докази за широко распространето незадоволство меѓу помладите работници, а не анегдотски. Да потсетиме дека пандемијата предизвика безброј отпуштања ширум светот. Беа отпуштени луѓе, но и самите си заминуваа.
Во Америка, овој тренд беше наречен „големата оставка“. Се користи за луѓе кои ги напуштаат своите работни места во потрага по нешто ново, менувајќи ги приоритетите. Во еден момент голем број од овие приказни наречени „QuitTok“ станаа вирални. Луѓето ги споделија своите причини за напуштање или добивање на работа, што собра милиони прегледи, заплашувајќи ја корпоративната Америка.
Нешто делумно слично се случи и во Кина. Генерацијата Z и милениумците во бунт ги измислија термините за време на пандемијата – „инволуција“ (спротивно од еволуцијата, враќање на првобитната положба и сè помалку работа) и „исправено лежење“ (движење за отфрлање на социјалните притисоци да се работи премногу) – да се опишат слични чувства на недостаток на мотивација и работна култура која еволуирала надвор од идејата дека работата без престан ќе биде соодветно наградена.
Секоја втора личност е под стрес на работа
Неодамнешното истражување за состојбата на глобалниот пазар на труд во 2022 година, покажа дека само 21 отсто од вработените се всушност ангажирани на работа, а само 33 отсто напредуваат и имаат желба да го сторат тоа. Од друга страна, 44 отсто од вработените изјавиле дека чувствуваат стрес во текот на работниот ден.
Кој „тивка оставка“, а кој ова го смета за губење време?
Сето ова може јасно да се види на социјалните мрежи. На пример, виралноста на гореспоменатото видео за „тивка оставка“ сугерира дека недостатокот на мотивација поради заканата од стрес кај младите е широко распространет. Има илјадници коментари од луѓе кои се пронаоѓаат во зборовите кажани во ова видео, а на оваа тема се направени стотици видеа.
„Не мора да работите повеќе од потребното, бидејќи компаниите и претпоставените не ви покажуваат наклонетост во тој случај“, е еден од коментарите.
Но, имаше и такви кои не се согласуваа со теоријата за „тивка оставка“. Еден корисник рече дека не треба да молчите, туку треба да разговарате со работодавачите, бидејќи тие можеби не знаат колку работа сте земале: „Тивко да се откажете е буквално губење време и како да си пукате во нога“. Затоа ве молам, не го правете тоа“.
Имаше и такви кои ја коментираа професионалната страна на „тивок откаа“ како нездрав механизам за справување со фактот дека вашата работа ги преминала границите на она што е вашата работа или не е во согласност со вредностите што ги негувате.
Милениумците успеаја, ќе успее ли и генерацијата Z?
Она што е сигурно е дека „тивок отказ“, „инволуција“, „исправено лежење“ и „QuitTok“ се начините на генерација Z да се бунтува против она што им пречи.
Останува да видиме дали нешто ќе произлезе од обичните интернет трендови, но важно е да се потсетиме на милениумците и синдромот што тие буквално го прославија – синдромот на исцрпеност на работното место, и тоа со многу помалку можности од оние на денешните генерации .
Од средината на 2019 година, Светската здравствена организација (СЗО) го вклучи овој синдром во својот прирачник за меѓународна класификација на болести и оттогаш здравствените работници можат да го дијагностицираат „прегорувањето“ како медицинско нарушување поврзано со работата што ја извршува поединецот.
