Најмоќните земји на Стариот континент се подготвуваат за мрачно сценарио по заострувањето на односите со Руската Федерација, која во секој момент може да го прекине протокот на гас.
Европската унија (ЕУ) се соочи со најтешката криза во својата историја, откако ги прекина многуте енергетски врски со Руската Федерација и нејзиниот претседател Владимир Путин, и со тоа ги доведе своите граѓани во ситуација кога нервозно ја чекаат зимата што доаѓа, а сега деталите на планот на Европската комисија (ЕК) протекоа во јавноста, за тоа како ќе изгледа борбата за секој киловат-час електрична енергија во наредниот период.
Според деталите од документот, чија содржина ја виде Фајненшл тајмс, може да се види дека во текот на претстојната зима ниту една зграда, деловен или комерцијален простор во земјите членки на Унијата нема да се загрева на повеќе од 19 степени.
Од друга страна, се очекува на 20 јули кога ќе биде објавен планот, тој да биде обелоденет и во иднина споменатите области да се разладуваат на само 25 степени, што имајќи ја предвид моменталната топлина на Стариот континент, би можел да биде дочекан со огромно незадоволство.
До оваа година, поточно до февруари 2022 година, кога Русија започна инвазија на соседна Украина, таа земја испорачуваше околу 40 отсто од гасот на ЕУ.
Меѓутоа, откако Западот воведе санкции кон Москва какви што светот никогаш не ги видел, а кои имаа за цел да ја казнат руската страна за агресија врз поранешната република на СССР, од средината на јуни, испораката на гас преку „Северен ток 1“, најголемиот гасовод од Русија до Унијата, е намален за дури 60 отсто.
-Вкупните текови од Русија сега се помалку од 30 отсто од просекот забележан меѓу 2016 и 2021 година, се наведува во нацрт документот чија цел, како што се нагласува, е да се заштити индустријата, која е особено важна за синџирот на снабдување и конкурентност.
Наводно, развојот на планот се должи на стравот дека Путин ненадејно и целосно може да го прекине снабдувањето со гас во Европа, бидејќи тоа веќе се случило со некои земји како Полска, Бугарија и Финска.
Тие земји, да потсетиме, веќе не добиваат енергенси од Руската Федерација, додека понудата на Германија, Данска, Холандија и Италија е значително намалена.
-Сега секој може и мора да штеди гас, се наведува во документот на комисијата и се предупредува дека нема индиции дека состојбата може да се подобри, туку сосема спротивно.
-Симулациите на регулаторното тело ENTSO-G покажаа дека прекинот на испораките во јули ќе доведе до недоволно полнење на складиштата на гас, што може да доведе до недостиг во зима и следната година. Доколку, пак, прекинот на испораките дојде во октомври или подоцна, ќе има помалку проблеми со покривање на побарувачката за зимата, се објаснува во текстот и се посочува дека последиците за членките на ЕУ зависат од степенот на зависност од рускиот гас, што значи дека најголемиот товар би можеле да го носат членките како Германија и Австрија.
Токму затоа вчера реагираше Клаус Милер, директор на германската Федерална агенција за енергетска мрежа (Bundesnecagentur), кој нагласи дека и во најлошото сценарио, домаќинствата ќе останат на врвот на приоритетите за снабдување.
-Во тој случај, Германија ќе добива гас од Норвешка и од терминалите во Белгија или Холандија, а наскоро и директно преку германскиот брег, се обиде Милер да ја смири домашната јавност.
Инаку, планот на ЕУ предвидува можност најавените мерки да не дадат резултат, па во тој случај би требало да се премине на подрастични чекори, односно на прекини на струја.
-Земјите од ЕУ можеби ќе треба да започнат со делумно или целосно ограничување на одредени групи потрошувачи. Приоритизацијата на секторите најверојатно ќе се разликува меѓу земјите на ЕУ, но се препорачува влијанието врз здравјето, храната, безбедноста и животната средина, безбедноста и одбраната да бидат вклучени во националните приоритети, се наведува во документот.
Да потсетиме, ЕУ во мај побара од земјите-членки до ноември да ги наполнат капацитетите за складирање гас до 80 отсто за да имаат доволно енергија за зимата.
Но, неодамнешните потези на Москва за запирање на испораките за балтичките земји, Финска, Полска и Бугарија и намалување на протокот кон Германија и Италија значи дека земјите најверојатно нема да ја исполнат целта.
Што содржи планот?
-повик до големите потрошувачи, како што се многу фабрики, да ги намалат потребите за гас пред зимата во замена за финансиски стимулации
-охрабрување на земјите да се префрлат на обновливи извори на енергија или одложување на затворањето на нуклеарните централи за да се намали употребата на гас
-електраните на јаглен, кои се рестартирани, најверојатно ќе бидат изземени од целите за индустриски емисии според плановите
-предлог земјите-членки на ЕУ да го ограничат греењето во јавните згради на 19 степени Целзиусови и ладењето на 25 степени
-препораки за тоа како да започнете информативни кампањи за промовирање начини за заштеда на енергија
-повик до приватните домаќинства доброволно да ја намалат потрошувачката
Цената на гасот за домаќинствата ќе биде тројно повисока!
Клаус Милер, директор на германската Федерална агенција за енергетска мрежа (Bundesnecagentur), издаде страшно предупредување дека цената на гасот во земјата се очекува да порасне најмалку три пати веќе на почетокот на 2023 година.
-Германците треба поактивно да ја намалат потрошувачката на тој енергенс бидејќи секој заштеден киловат може да помогне да се одложи или спречи исклучувањето на индустриските корисници и да се забави растот на трошоците за домаќинствата, истакна Милер во интервју за германската телевизија RND и додаде дека оние кои сега добија спогодба, сметката за потрошениот гас е веќе двојно зголемена, а во тие цени сè уште не се вклучени последиците од војната во Украина.
-На берзите цената на гасот скокна седум пати, па сега е корисно да се заштеди повеќе – посочи тој.
