Американците кои летово ги посетуваат Италија, Грција и Шпанија, по паузата поради пандемијата со Ковид-19, имаат среќа: храната, хотелите и турите се најприфатливи во долари во последните две децении.
Што се случува? Еврото падна на околу 1,03 долари, што е намалување за повеќе од 8% во однос на американскиот долар од почетокот на годината.
Еврото моментално се тргува на најниско ниво од крајот на 2002-ра година.
Повеќето аналитичари исто така не веруваат дека еврото формирало дно. Има предвидувања дека еврото и доларот може да достигнат паритет, каде еден долар ќе се менува за едно евро.
„Јас сум негативно настроен кон еврото се додека не видам наслов кој вели дека глобалниот економски раст значително ќе се зголеми“, изјави аналитичарот на „Nomura“, Џордан Рочестер, за „CNN Business“. Тој смета дека до крајот на август ќе се постигне паритет меѓу еврото и доларот.
Она што е профитабилно за американските туристи создава тешкотии за бизнисите во Европа кои мора да купуваат енергетски производи, суровини и компоненти во долари. Зголемените трошоци за увоз може да продолжат да ги зголемуваат цените во 19-те земји кои го користат еврото, каде што годишната инфлација достигна рекордни 8,6% во јуни.
Што ја поттикнува распродажбата на еврото, втората најкористена валута во светот? Аналитичарите укажуваат на неколку фактори.
Пред се, тоа се економските перспективи. Стравувањата од рецесија растат ширум светот. Сепак, близината на Европа до војната во Украина и нејзиното историско потпирање на Русија за нејзините енергетски потреби ја направија поранлива од САД.
Цените на природниот гас во Европа се на највисоко ниво од март. Русија ограничи дел од испорачаните количини природен гас за Европа, а испораките долж гасоводот „Северен тек“ целосно ќе запрат поради одржување на цевката. Работниците во енергетскиот сектор во Норвешка стапија во штрајк, што дополнително го загрози снабдувањето.
„Очекуваме зимска криза во еврозоната и очекувам цените на енергијата да останат многу високи“, вели Рочестер.
Еврото има тенденција да слабее кога апетитот за ризик на инвеститорите се намалува.
Друг проблем е трговијата. Германија неодамна забележа трговски дефицит, што е реткост за земјата и знак дека високите цени на енергијата го прават данокот на извозниците во најголемата европска економија. Во оваа ситуација, потребно е поевтино евро за извозот од ЕУ да биде поконкурентен.
Европа, исто така, заостанува зад САД во зголемувањето на каматните стапки, иако Европската централна банка (ЕЦБ) се очекува да почне да ги зголемува стапките овој месец. Ова значи дека инвеститорите имаат поголема веројатност да ги насочат своите пари во САД, каде што добиваат подобри приноси.
Со зголемувањето на каматните стапки, постојат стравувања дека пазарите на обврзници во многу задолжените земји како Италија и Грција би можеле да бидат под притисок.
