Европската централна банка ќе создаде нов инструмент за справување со ризикот од фрагментација на должничкиот товар во еврозоната. Ова стана јасно по вонредниот состанок на институцијата, на кој се разговараше за остриот пораст на приносите на државните обврзници, што ги зголемува трошоците за задолжување на некои земји од еврозоната.
Приносите на обврзниците издадени од Италија и другите земји со високи долгови се зголемија откако ЕЦБ објави претстојна серија на зголемувања на клучните каматни стапки и ја заврши својата програма за купување обврзници во услови на зголемена инфлација.
„Управниот совет одлучи да ја примени флексибилност во реинвестирањето на плаќањата што треба да се направат во портфолиото на програмата за итен откуп, со цел да се одржи функционирањето на механизмот за пренос на монетарната политика“, соопшти ЕЦБ.
Тоа, исто така, покажува дека раководството на ЕЦБ ќе им наложи на релевантните комитети на Евросистемот да го забрзаат завршувањето на дизајнот на новиот инструмент против фрагментација.
Соочен со заканата од повторување на должничката криза, која и нанесе тежок удар на единствената валута пред една деценија, Управниот совет на ЕЦБ бара соодветен одговор на актуелните пазарни превирања.
Во меѓувреме, на должничките пазари, распонот помеѓу приносите на германските државни обврзници и оние на позадолжените земји на јужните делови од континентот се искачи на највисоко ниво од екот на пандемијата пред две години. Ова беше прифатено од инвеститорите како знак за опаѓање на довербата во овие земји.
ЕЦБ има неколку опции за да се спротивстави на таканаречената „фрагментација“ – кога некои земји се соочуваат со значително повисоки трошоци за нивните државни заеми од другите, вклучително и префрлање на инвестициите од доспеани обврзници на пазари кои се под стрес.
Сепак, некои аналитичари предупредуваат дека само таков потег веројатно нема да биде доволен, па ЕЦБ би можела да развие сосема нов инструмент. Работата на сличен механизам започна на почетокот на оваа година, но досега не е постигнат напредок, велат извори на „Reuters“.
Вонредниот состанок на Европската централна банка се одржува истиот ден кога се очекува американската централна банка да ги зголеми каматните стапки.
Претходно денеска, приносот на 10-годишните државни хартии од вредност во Германија достигна 1,77% – нивно највисоко ниво од почетокот на 2014-та година, додека оној на нивниот италијански колега скокна за 240 базични поени, што е највисокиот распон од почетокот на 2020-та година.
Италија продаде 2,5 милијарди евра од 7-годишната обврзница што доспеваше на 15-ти јуни 2029-та година со 3,75% бруто принос, највисок од октомври 2013-та година и нагло зголемување од 2,39% на претходната аукција.
Должничката криза заврши пред една деценија дури кога тогашниот претседател на ЕЦБ и актуелен италијански премиер Марио Драги вети дека ќе го направи „она што е неопходно“ за да го спаси еврото, по што следуваше невиден и досега неискористен спас.
Последен пат ЕЦБ одржа непланирана средба за време на пазарните превирања беше на почетокот на пандемијата Ковид-19. Институцијата потоа ја започна програмата за итен откуп на обврзници од 1,7 трилиони евра, која се покажа како нејзина главна алатка за закрепнување од кризата.
