Македонските граѓани се соочуваат со сериозни прашања околу безбедноста на храната која секојдневно ја ставаат на својата трпеза.
Од почетокот на оваа година досега, уништени се над 56 тони храна поради присуство на бактерии, пестициди, па дури и нејодирана сол.
Инспекциите се почести, казните построги, но довербата кај потрошувачите сè уште не е целосна.
Најголема загриженост предизвикува фактот дека дури и производите кои се сметаат за најбезбедни, како минералната вода, биле мета на сериозни контроли.
Експерти предупредуваат дека бактериите пронајдени во водата и зеленчукот може да предизвикаат сериозни здравствени проблеми, особено кај децата и кај постарите лица.
Нутриционистите потенцираат дека е неопходна поголема едукација за тоа што точно внесуваме во организмот.
„Граѓаните често не знаат што купуваат, ниту пак колку опасни можат да бидат некои состојки. Контролите мора да бидат постојани, но и јавноста мора да биде информирана за последиците од несоодветна храна“, велат нутриционистите.
Според податоците, за само пет месеци инспекторите направиле над 12.000 проверки во продавниците, рестораните и во супермаркетите ширум земјата.
Како резултат, изречени се повеќе од 1.300 санкции, од кои значителен број се парични казни и привремени забрани за работа.
Граѓаните исто така сè почесто алармираат на социјалните мрежи и преку телефонските линии за неправилности во продавниците.
Кумановката Олгица, која неодамна пријавила продажба на расипан зеленчук во локална продавница во Куманово, вели дека е загрижена од тоа што ваквите случаи се чести.
„Не сакам да живеам со страв дека моите деца јадат небезбедна храна. Ова не е игра, ова е прашање на живот и здравје. Инспекторите реагираа брзо по пријавата, но зошто воопшто доаѓа до такви ситуации?“ прашува таа.
Економистот Ведран Кузмановски, пак, смета дека казните се високи, но треба да бидат уште поригорозни за да се одвратат трговците од нелегални или штетни практики.
„Факт е дека некои бизниси свесно ризикуваат со здравјето на потрошувачите заради поголем профит. Мора да бидеме бескомпромисни со казните, за да можеме да се надеваме на вистинска промена во начинот на кој се однесуваат компаниите“, вели Кузмановски.
Од АХВ уверуваат дека ќе продолжат со интензивни проверки, додека здруженијата на потрошувачи бараат поголема транспарентност и посериозни санкции за сите кои се обидуваат да профитираат на штета на здравјето на граѓаните.
Безбедноста на храната е клучна за здравјето на нацијата, но довербата останува кревка сè додека граѓаните секојдневно прашуваат што, всушност, јадеме.
Б.З.М.
