Во десет банки во Словенија, вклучувајќи ги и тие во државна сопственост, ќе се направи проверка и ќе се прегледа квалитетот на средствата, објави словенечката централна банка.
Со тоа се исполнува препораката на Европскиот совет од јуни оваа година.
Покрај претставниците на централната банка и министерството за финансии, во одборот кој ќе ја следи проверката на ситуацијата во банките ќе бидат и надзорници од Европската комисија, Европската централна банка, како и од Европската канцеларија за надзор на банките.
На стрес тестови и прегледот на квалитетот на средствата ќе бидат, по препорака на ЕУ, изложени „Нова Љубљанска банка“, „Нова кредитна банка Марибор“ и „Абанка“ и уште седум банки: „Банка Целје“, „Горењска Банка“, „Пробанка“, „Фактор Банка“, „Уникредит банка Словенија“, „Хипо Адриа Банк“ и „Раифаизен Банк“.
За спроведување на стрес тестовите е именувана фирмата „Oliver Wyman“, а за преглед на квалитетот на средствата на фирмите „Deloitte“ и „Ernst&Young“.
Ќе се направи и независна проценка на вредноста на недвижностите со кои располагаат банките, а сите резултати од прегледите би требало да бидат познати до крајот на годината.
Како што пренесуваат словенечките медиуми, овие проверки би требало да покажат колку додатен капитал им е потребен на банките, според различни сценарија на развојот на ситуацијата на финансискиот пазар до 2015 година и колку се оптоварени со лоши кредити.
Како што наведуваат медиумите, тоа е поврзано со барањето на Европската комисија во банките кои се во сопственост на државата да се спроведе ревизија уште пред да се префрлат нивните лоши кредити на таканаречената лоша банка.