Пазарите на труд во развиените земји повратија само половина од изгубената работа што ја пријавија за време на пандемијата, а најтешко беа погодени младите и ниско квалификуваните работници, пренесува „Bloomberg“.
Ова е заклучок од студија на 400 страници на Организацијата за економска соработка и развој (ОЕЦД), според која околу 22 милиони работни места исчезнале до крајот на 2020-та година во индустриски развиените земји. Институцијата со седиште во Париз соопшти дека целосно закрепнување на нивото пред пандемијата нема да се случи до крајот на следната година.
Податоците покажуваат дека пандемијата на коронавирусот забрза голем број трендови што започнаа во изминатите десет години, вклучително и зголемена нееднаквост во приходите, пренасочување кон работни места кои бараат поголеми технички вештини и помалку безбедни можности за вработување за ниско квалификувани работници.
„Ако не успееме да се справиме со нееднаквоста и исклучувањето сега, веројатно е дека не само што ќе има подлабока поделба во општеството, туку ќе има и негативни последици врз продуктивноста и економското закрепнување“, рече Стефано Скарпета, директор на одделот за вработување, труд и социјалната политика во ОЕЦД.
Организацијата откри „брза акумулација“ на долгорочна невработеност, а секој бран на ограничувања поради пандемијата им го отежнува враќањето на луѓето на пазарот на труд.
„Може да има растечко несовпаѓање помеѓу вештините и компетенциите на вработените кои ја изгубиле својата работа и вистинските вештини што се бараат за создавање работни места“, рече Скарпета на прес-конференција.
Оние вработени во хотелската и ресторанската индустрија и во услужниот сектор, кои беа принудени да затворат со месеци, регистрираа највисоки нивоа на невработеност и пониски нивоа на образование од лицата со занимања што може да се направат од дома. Вработувањето се зголеми во сектори како што се финансиите и осигурувањето дури и среде пандемијата, а работното време е намалено за повеќе од 28% во занимањата со пониски плати.
Авторите на извештајот предупредуваат на „особено загрижувачката“ зголемена невработеност кај младите во повеќето земји и ги повикуваат владите да ги зголемат можностите за преквалификација.
„На крајот на краиштата, треба да дојдеме до ситуација економијата да може да се прилагоди, каде што ќе можеме да идентификуваме вистински одржливи бизниси со идни можности за раст“, рече генералниот секретар на ОЕЦД, Матијас Корман.
Бројките на организацијата исто така покажуваат дека околу 114 милиони работни места ширум светот биле изгубени за време на пандемијата.
Покрај тоа, имаше повеќе од 8 милиони луѓе кои беа невработени пред кризата и најмалку уште 14 милиони луѓе кои беа класифицирани како неактивни на пазарот на труд во земјите-членки на ОЕЦД.
Растот на работата од далечина на долг рок може да ги влоши нееднаквостите во работните услови. Ова покажува дека обуката, инвестициите и регулативата треба да се зајакнат за да се прошират техничките вештини на луѓето со пониско платени занимања.
