Силното зголемување на обемот на увоз на основни прехранбени производи во минатата година влијаеше на растот на глобалните трошоци за увоз.
Организацијата за храна и земјоделство на Обединетите нации (ФАО) предвидува зголемување на цената на увозот на храна ширум светот во оваа година за 12 проценти, во споредба со 2020-та година, вклучувајќи ги и трошоците за испорака, на рекордни 1,71 трилиони долари.
Тоа ќе изврши притисок врз многу од најсиромашните земји во светот, чии економии се веќе уништени од пандемијата со Ковид-19, се вели во извештајот за глобалните изгледи за храната, кој се објавува на секои две години од ФАО, достапен на официјалната веб-страница на агенцијата на ООН со седиште во Рим.
Високите трошоци може да се одржат подолг временски период, бидејќи скоро сите земјоделски производи поскапуваат веќе некое време, со натамошно зголемување на цените на енергетските пазари веројатно ќе ги зголемат трошоците за производство на земјоделците.
Силното зголемување на обемот на увоз на основни прехранбени производи во минатата година влијаеше на растот на глобалните трошоци за увоз, вклучувајќи ги и трошоците за транспорт, за 3,0 проценти на 1,53 трилиони долари.
„Иако зголемувањето на земјоделската трговија за време на пандемијата покажува отпорност на овој сегмент на меѓународниот пазар, растот на цените од крајот на 2020-та година ги зголемува ризиците за одредени земји кои се зависни од увоз на храна“, се вели во извештајот.
Документот предвидува дека трошоците за увоз на храна – во земјите класифицирани од ФАО како земји со ниски приходи и дефицит на храна – ќе скокнат за 20 проценти во оваа година, со што економиите кои се потпираат на туризмот се во особено незавидна ситуација.
Посебниот индекс на трошоци за увоз на храна, вклучително и трошоците за транспорт, кои исто така растат, достигна рекорд во март оваа година, надминувајќи ги нивоата забележани за време на претходните скокови на цените на храната во периодот 2006-2008 година и 2010-2012 година, посочува ФАО.
