Од јули годинава роаминг услугите ќе се тарифираат по цени како да сме дома. Оваа поволност е договор помеѓу земјите од Западен Балкан. Спогодбата за намалување на цените на роаминг услугите ќе важи за телефонските разговори, СМС пораките и користењето на Интернет. Првичниот договорот беше потпишан на четврти април 2019 година помеѓу Македонија, Србија, Црна Гора, Албанија, Косово, Босна и Херцеговина.
Кон крајот на јуни 2019 година Агенцијата за електронски комуникации донесе Одлука за утврдување на максималните цени на услугите во роаминг во јавни мобилни комуникациски мрежи. Тоа значеше дека со таквата Одлука се предвидува значително намалување на малопродажните и големопродажните цени на роаминг за корисниците на електронските комуникациски услуги во роаминг кои патуваат во петте земји на Западен Балкан. Од АЕК за Денар потврдуваат дека од јули годинава трошоците за користење на роаминг услугите во регионот ќе чинат како да сме во Македонија.
„Започнувајќи од 01/07/2019 па се 30/06/2021 кога цените за роаминг услугите ќе исчезнат, се воведе преоден или транзициски период во кој операторите за роаминг услугите ќе може да наплаќаат само одреден дополнителен надоместок на националните електронски комуникациски малопродажни цени. Со Одлуката од 21/09/2020 што ја донесе Директорот на АЕК, започнувајќи од 01/07/2021 се предвидува напуштање на дополнителното тарифирање за роаминг услугите, односно се воведуваат цени за роаминг услуги исти како цените на електронските комуникациски услуги на домашниот пазар (Roaming Like At Home). Тоа значи дека корисниците на роаминг услугите од Македонија започнувајќи од 01/07/2021 нема да доплаќаат повисоки цени од домашните тарифни модели за користење на роаминг услугите кога ќе патуваат во останатите пет земји потписнички на оваа спогодба, без разлика дали станува случај за користење на Интернет, говор или СМС“, вели директорот на АЕК, Јетон Акику.
Информациите од АЕК велат дека влезниот повик ќе се третира исто како и влезниот повик на домашниот пазар, односно без дополнителен надоместок за корисникот. Според АЕК користењето на роаминг услуги под вакви поволности е регулирано под одредени политики за фер и одржливост, кои што се пропишани од страна на регулаторот во посебен правилник. А ваквата пракса е по примерот на регулативата од Европската Унија, со цел да се отстранат можностите за злоупотреба, како и да се задржи одржливоста во финансиското работење на телекомуникаџциските оператори. Ваквите поволности за граѓаните придонесоа до намалување на цените за роаминг услугите во просек од 83 до 99 отсто и тоа уште во првата година од неговото имплементирање, во споредба со претходните цени на малопродажните роаминг услуги во земјите од Западен Балкан.
Од АЕК велат дека нема никакви дополнителни услови кои треба да се исполнат од страна на државите за овој договор да почне на лето да се реализира. Целата потребна регулатива е веќе донесена од страна на АЕК и целосно се спроведува, потврдија од регулаторот на телекомуникацискиот пазар во земјава. Инаку, само за споредба во моментов па се до 30.06.2021 година цените кои граѓаните на Македонија ги плаќаат за разговори во државите од Западен Балкан изнесуваат, за повик кон Македонија 3,64 денари, и дојдовен повик 1,82 денари.
„Намалувањето на цените на услугите во роаминг секако дека значи чекор поблиску и до намалување на цените на роамингот со ЕУ. На граѓаните од државите на Западен Балкан значително им се намалуваат бариерите во меѓусебната комуникација, се зголемува потенцијалот за водење бизнис, размена на искуства во целокупниот домен на општеството: образование, наука, здравство, култура“, додаваат од АЕК.
Секако, ваквите поволности нема да важат за земјите членки на Европската унија, а кои се дел од нашето опкружување. Кај државите од Унијата постојат други правила. За да се постигне тоа, првично е потребно Македонија да потпише Спогодба за намалување на цените во роаминг и со ЕУ, по примерот по кој државите од Западен Балкан се договорија за намалување на цените, за што токму и Европската Унија даде значајна поддршка. Информациите велат дека земјава е подготвена да потпише таква спогодба со Европската Унија и веднаш да започне со имплементација доколку се укаже таква можност.
За поволноста која ја очекува регионот се огласи и генералниот секретар на Советот за регионална соработка Мајлинда Брегу, која го истакна оптимизмот дека по завршувањето на пандемијата граѓаните од државите во регионот повторно ќе ги почуствуваат придобивките од меѓусебната соработка. Таа е задоволна што е склучен договор со кој се елиминираа високите трошоци за роаминг кои беа дури четири пати повисоки во однос на тоа што го плаќаат граѓаните на државите членки на Европската унија. Според неа, потпишувањето на овој договор за намалување на цените на роамингот на Западен Балкан е историско достигнување и еден од главните резултати на Дигиталната агенда на Западен Балкан.
„Нашиот следен чекор е да ги намалиме цените на роамингот помеѓу Западен Балкан и Европската унија, што ќе бара целосна посветеност на сите вклучени актери, особено телеком операторите, како и подеднакво важна техничка поддршка од Европската комисија, Генералниот директорат за комуникациски мрежи, содржина и технологија и Генералниот директорат за соседски преговори и преговори за проширување и највисоките претставници од регионот“, вели Мајлинда Брегу.
Западен Балкан без роаминг и намалувањето на цените на роамингот со Европската унија се дел од програмата на заедничкиот регионален пазар, на кој лидерите на Западен Балкан се обврзаа на самитот во Софија во ноември 2020 година.
И.П
