Тоа што требаше да биде „пеколна недела“ за Реал Мадрид, на крајот може да се покаже како клучна во сезоната, откако „кралевите“ ги исполнија очекувањата и со 2:0 победа над Борусија Менхенгладбах го обезбедија првото место во својата група и пласман во осминафиналето на Лигата на шампионите.
За среќа на Гладбах, и тие ќе се приклучат меѓу најдобрите 16 во Европа, откако ривалите во групата, Интер и Шахјтор го одиграа единствениот резултат кој им одговараше – 0:0 реми по кое Интер е на последното место на табелата и не поминува ниту во Лига Европа (каде што оди украинскиот тим).
Карим Бензема стана само третиот фудбалер кој постигнал 50 гола во групната фаза на ЛШ (по Роналдо и Меси), откако со два гола во првото полувреме го реши победникот на „Естадио Алфредо ди Стефано“. Во Милано пак, Интер доби шанса со победа да направи скок и да оди во осминафиналето, но во внимателна игра тие одиграа само 0:0 со Шахтјор за крај на европските надежи.
И вториот мадридски клуб, Атлетико Мадрид, рутински го обезбеди местото во осминафиналето, откако со 2:0 победија на гостувањето кај Ред бул Салцбург со головите на Ермосо и Караско за второ место во групата А зад шампионот Баерн Минхен.
ЛИГА НА ШАМПИОНИ, 6.КОЛО
ГРУПА А
Баерн Минхен – Локомотив Москва 2:0
Ред бул Салцбург – Атлетико Мадрид 0:2
Конечна табела: 1.Баерн М. 16, 2.Атлетико М. 9, 3.Салцбург 4, 4.Локомотив М. 3
ГРУПА Б
Интер – Шахтјор Доњецк 0:0
Реал Мадрид – Борусија Менхенгладбах 2:0
Конечна табела: 1.Реал Мадрид 10, 2.Борусија М. 8, 3.Шахтјор 8, 4.Интер 6
ГРУПА Ц
Манчестер сити – Марсеј 3:0
Олимпијакос – Порто 0:2
Конечна табела: 1.Манчестер С. 16, 2.Порто 13, 3.Олимпијакос 3, 4.Марсеј 3
