Американците сега се најбогатата нација во светот поминувајки ги Швајцарците, додека богатството во остатокот од светот постепено се „топи“.
Ова се должи на забуната околу Брегзит и трговската војна САД-Кина, покажуваат резултатите од едно истражување.
Според најновиот извештај за глобалното богатство на германската осигурителна компанија Allianz, просечните нето финансиски средства на луѓето кои живеат во САД се 184.411 евра (203,128 американски долари) по глава на жител, наспроти 173.838 евра колку што изнесува приватното богатство на еден Швајцарец. Доставените податоци се за 2018 година.
Подемот на Соединетите држави на врвот на листата на најбогати нации во голема мера се должи на силата на доларот, како и на американските домаќинства, кои се главните двигатели на растот на глобалниот проток на средства, бидејќи две третини од сите заштеди во индустријализираните земји доаѓаат од САД, соопшти осигурителната компанија.
Во извештајот се наведува и дека новата заштеда означи глобален рекорд бидејќи се искачи за 22 проценти на повеќе од 2.700 милијарди евра. Ова се припишува на минатогодишната даночна реформа во САД, според која американските граѓани ги зголемиле новите заштеди за 46 проценти.
Иако САД го зазедоа првото место во извештајот, Швајцарија е сè уште на врвот во однос на бруто-финансиските средства по глава на жител, со бројка од 266.318 евра во однос на 227.364 евра колку што изнесуваат во САД.
И Швајцарија и САД се далеку пред трето рангираниот Сингапур, каде што вкупното нето финансиско богатство по глава на жител е само 100.370 долари.
Севкупно, извештајот на Алијансата е прилично песимистички во врска со изгледите за глобалното богатство и исто така посочи дека растот на глобалното финансиско богатство во 2018 година опадна за 0,1 процент, прв пат по финансиската криза во 2008 година.
Тие ја обвинија трговската војна меѓу САД и Кина, неизвесноста околу Брегзит, што ги зголеми геополитичките тензии и „затегнувањето на монетарните услови“.
