Како што информираат од Министерството за земјоделство шумарство и водостопанство, почнува со порибување на риболовните води во земјата, кои во моментот немаат концесионер.
Денеска почна порибување на акумулацијата „Глобочица“, а настанот го проследи и министерот за земјоделство, шумарство и водостопанство, Љупчо Николовски. Оваа акумулација се пориби со 40 килограми или 8.000 подмладоци од речна пастрмка и со 1.700 крапа“, соопштуваат од Министерството.
„Целта е зачувување и заштита на автохтоните видови риби во речните води, како и одржување на популацијата на рибите во оние риболовни води кои не се доделени на концесија. За оваа намена Министерството за земјоделство, шумарство и водостопанство, во согласност со законските одредби, во годишните програми за финансиска поддршка во рибарството и аквакултурата предвидува финансиски средства за порибување на водите без концесионер со подмладок од пастрмка и крап. Во годинешната програмата за финансиска поддршка во рибарството и аквакултурата за порибување на риболовните води без концесионер се обезбедени 300 илјади денари, со кои ќе изврши порибување со 150 килограми подмладок од речна пастрмка или околу 30.000 единки и 350 килограми подмладок од крап, односно околу 2.350 единки“, изјави министерот Николовски.
Исто така, денеска ќе се изврши порибување и на риболовниот ревир „Црн Дрим 2“ со 20 килограми речна пастрмка, а во текот на утрешниот ден, се додава во нивното соопштение, ќе се порибат другите риболовни води предвидени во планот.
