Министерката за труд и социјална политика, Мила Царовска, е во дводневна работна посета на ЈУ Специјален завод „Демир Капија“ со цел да направи личен увид во организациските промени и стручната работа, а во насока на подобрување на условите во Заводот, информираат од Министерството за труд и социјална политика.
Договорено е деновиве штитетиниците да добијат темелни здравствени прегледи од страна на стоматолог, гинеколог, физијатар и невропсихијатар.
Царовска исто така даде насоки и за промена на менито за да се подобри исхраната на лицата сместени во оваа установа.
Констатирано е подобрување во заштитата на децата од Заводот, како резултат на проектот на УНИЦЕФ и Сојузот на дефектолози, којшто почна да се реализира од август годинава. Искуствата и методите од овој проект ќе се искористат за подобрување на грижата и за возрасните штитеници.
МТСП доби дополнителна поддршка од Амбасадата на Обединетото Кралство во Република Македонија, преку Хелсиншкиот комитет за човекови права, со која се обезбеди помош за раководењето на Заводот, за подобрување на условите за стручната работа, како и за подготовка за процесот деинституционализација, односно трансформација на големите установи во домување со поддршка во заедницата и социјални услуги на локално ниво. Од Министерството информираат дека оваа системска реформа ќе овозможи вистински хуман третман на лицата со попреченост и почитување на нивните човекови права.
