Работа во Германија: Балканците добија 63.000 дозволи

Во првите осум месеци од оваа година германската Сојузна агенција за вработување додели 63.000 работни дозволи на луѓе од регионот на Западен Балкан, што е за 70 проценти повеќе, отколку во истиот период од минатата година.

Причината за растот е специјалната регулатива за Западен Балкан, воведена во почетокот на 2016-та.

Кризата предизвикана со доаѓањето на големиот број мигранти од Сирија и Ирак тогаш се влоши поради се поголемиот прилив на баратели на азил од Косово, Албанија, Македонија, Србија и Босна и Херцеговина.

Германија ги прогласи овие земји за безбедни, па мигрантите кои пристигнуваа од нив речиси и да немаа шанси да добијат азил.

Како реакција на тоа, воведени се значителни олеснувања за трудовите мигранти од Западен Балкан: како поднесување на доказ дека му е понудена конкретна работа во Германија, при што се добива работна дозвола, а притоа не се бара доказ за квалификациите.

Сојузната агенција за вработување само проверува дали постои домашен кандидат за тоа работно место, но во 4 од 5 случаи дава „зелено светло“. Наспроти тоа, критериумите за гастарбајтери од трети земји се многу строги.

Според информациите од Институтот за истражување на пазарот на труд и вработување (IAB), од Западен Балкан главно пристигнуваат неквалификувани (47 oтсто) и полуквалификувани работници (49,6 oтсто), додека уделот на факултетски работници и други експерти изнесува само 3,4 посто.

Убедливо најмногу работни дозволи се издаваат на работниците во градежништвото (речиси половина). Во угостителството побарувачката на работна сила од Балканот е исто така голема, но се бараат и хигиеничарки, негувателки и градинари.

Работната виза трае додека лицето е вработено, а предвидено е луѓето да се вратат во татковината кога ќе останат без работа. Мигрантите, меѓутоа, имаа право на социјално доколку во Германија имаат работено најмалку 12 месеци. Поради тоа не е исклучено да останат, дури и да ја загубат работата.

Дозволата од Сојузната агенција за вработување, сепак не гарантира право на влез во земјата, затоа што работниците прво мораат да поднесат барање за виза во својата земја, а во повеќето земји од Западен Балкан за виза се чека повеќе месеци.

Регулативата за Западен Балкан која е воведена во екот на бегалската криза, важи до 2020-та година.