Со отворање на изложбата “Урбани херои на Скопје”, денес во Јавна соба ќе започне фестивалот “Дотерај го Скопје”.
Изложбата е производ на висока свест и видлив активизам пресликан преку 50 интервенции на запуштени јавни простори во шест општини во Скопје кои беа “дотерани” од страна на граѓаните. Доктори, адвокати, стоматолози, музичари, ликовни уметници, пожарникари, дизајнери, трговци, бербери, угостители од сите генерации се дел од изложбата “Урбани херои на Скопје”.
Фестивалот Дотерај го Скопје е заокружување тримесечната интензивна работа на терен на граѓаните и неуморниот тим кој за време на овој настан ќе најави нова кампања за разубавување на градот во 2018 година.
Повеќе од 300 граѓани излегоа летово на плус 40 степени и засадија 1.500 бршлени на 50 различни локации. Истовремено беа продуцирани пет музички спотови во продукција на Јавна соба и кретивната агенција Sawyer Finn од Скопје, кои премиерно ќе бидат промовирани од први до четврти септември во вечерните часови.
