Видео проект од македонскиот дигитален уметник Зоран Попоски ќе бидe прикажан во галеријата „Фабрика” во Брајтон, Велика Британија, во четврток, во 19.30 часот.
Видеото на Попоски е дел дел од меѓународниот уметнички проект „И двете страни сега 3 – Конечни граници”, кураторски проект на Ајзак Лунг (Видеотаж, Хонг Конг) и Џејми Вајлд (Видеоклуб, Велика Британија), во кое учествуваат дваесетина уметници од Хонг Конг, Кина и Британија.
„И двете страни сега 3 – Конечни граници” претставува колекција на филмови и видеоарт од Британија, Кина и Хонг Конг кои ги истражуваат темите на релокацијата, миграцијата и меморијата. „Со оваа колекција од филмови имаме за цел да ги истражиме личните искуства, глобалните теми и фрактури кои треба да се залечат преку културна размена и споделување. И двете страни сега е тактичка програма, којашто ги користи филмот и видеото за проучување на културата и општеството во Британија, Кина и Хонг Конг, и подалеку”, истакнуваат Лунг и Вајлд во нивната кураторска изјава за проектот.
Зоран Попоски во 1974 година е роден во Скопје, магистрирал уметност во нови медиуми, а докторирал студии на културата. Има реализирано повеќе од 70 меѓународни изложби. Негови јавни уметнички проекти се презентирани во Њујорк, Скопје, Даблин, Хонг Конг, итн. Во своите видеа, перформанси и дигитални графики, Попоски ги истражува прашањата на идентитетот, територијата и јавниот простор.
