Во бугарскот град Пловдив во четвртокот вечерта беше отворена ликовна изложба, на која изложуваат тринаесет македонски ликовни уметници, обединети во концепцијата „Конекција 2″, а посетителите изложбата ќе можат да ја видат до 15-ти август годинава.
Балабановата куќа, еден од најпознатите музејско-галериски простори во Стар Пловдив, беше домаќин на настанот што беше во организација на Културно-информативниот Центар на Македонија во Софија.
Пред голем број посетители, изложбата за отворена ја прогласија Валериј Ќорленски од Општинската фондација „Пловдив 2019″ и Васко Шутаров, директор на македонскиот Центар во Софија. На изложбата беа присутни и амбасадорот на Македонија во Бугарија Марјан Ѓорчев и конзулот Ненад Младеновиќ.
Ова е второ претставување на КИЦ на Македонија во Софија во Пловдив, град што во 2019 година ќе биде Европска престолнина на културата.
Директорот на Општинскиот инситут „Стар Пловдив”, Минко Кафтански и уредникот на програмата на „Балабановата куќа” Димитрина Петрова, по овој повод го изразија задоволството од заемната соработка со македонскиот културен Центар во Софија и подготвеноста за претставување на македонската култура со други содржини во наредниот период.
Изложбата „Конекција 2″ беше отворена со одбележување на националниот празник на Франција -14 јули, со дела во кои претежно доминира француска тематика.