Во Виена, во организација на Австриската национална библиотека, се одржа 30-та конференција на директорите на Националните библиотеки од Европа CENL (Conference of European National Libraries).
Директорот на Националната и универзитетска библиотека “Св. Климент Охридски”- Скопје, д-р Иван К. Заров, ја претставуваше Република Македонија.
На конференцијата се разгледаа стратешките приоритети за развој на асоцијацијата на европските национални библиотеки, нивната взаемна координираност, новите тенденции во библиотечното работење и соочување со предизвиците пред кои се исправени националните библиотеки во актуелниот социо-културен амбиент.
Особено беше подвлечено институционалното место и улога на библиотеката во дигиталното време како модератор и сервис на информации за сите културни, научни и општествени активности, преку креирање на развојни програми и внатрешно трансформирање на библиотеките и постојана едукација на професионалниот библиотечен кадар, менаџирањето на нови начини кои би го подобриле финансирањето, одржливоста, развојот и квалитетот на библиотечните услуги преку споделување на различните искуства на секоја од европските национални библиотеки.