Денеска во 20 часот, свечено ќе биде отворена изложбата на академскиот сликар Росица Лазеска, во галерискиот простор на НЛБ Тутунска банка, на ул. „Мајка Тереза“ бр.1, Скопје.
Росица Лазеска е академски уметник и дипломиран архитект од Скопје, инаку член на Друштвото на ликовни уметници на Македонија од 1992 година. До сега одржала 10 самостојни и повеќе од 25 групни изложби.
Со оваа изложба во НЛБ Тутунска банка, Лазеска се претставува преку своите дела, како автор со инвентивна ликовна имагинација и изразита креативна енергија. Се работи за динамичен сликар – графичар кој преку експресивната композиција ги спротивставува преплетите од линии, кои за момент се дисхармонични, а конечниот резултат е складно единство и хармонија. Својствено за Лазеска е што нејзините цртежи имаат еден жив ритам кој ни го доловува нејзиниот метафоричен јазик.