Бројот на прашања и обраќања на руските граѓани упатени за традиционалната годишна „Директна линија со претседателот на Руската Федерација, Владимир Путин“, надмина два милиона, соопшти телевизијата Россия-24.
Рускиот претседател денес го одржува традиционалниот годишен дијалог со Русите на ткн „директна/жешка линија“. Прашањата за Путин започнаа во Кремљ да ги примаат од 9-ти април и до средата попладнето, како што објави портпаролот Дмитриј Песков, пристигнале 1,7 милиони прашања од граѓаните.
Телевизија Россия-24, пак, пред почетокот на директното емитување на одговорите на Путин објави дека до 8 часот денес по московско време биле поставени повеќе од 2,2 милиони прашања за рускиот челник.
На 10-ти април Песков објави дека секоја минута отворената телефонска линија прима 3.135 повици со прашања за претседателот Владимир Путин, и според него тоа претставува осум пати повеќе отколку минатата 2014 година. Прашањата пристигнуваат, покрај телефонски, и преку ММС и СМС пораки, како и преку видео повици.
Рускиот претседател Владимир Путин во моментов го одржува својот традиционален дијалог со руските граѓани во рамките на ткн „директна линија“, што е директно емитувано на три телевизиски канали и три радио станици.
Традиционалните телевизиски „директни линии“ започнаа во времето на првиот претседателски мандат и првата се одржа на 24-ти декември 2001 година, што беше емитувано на два телевизиски канала и на две радио станици, и тогаш биле примени 400 илјади прашања. Рекордно траење „линијата“ имаше во 2013 година, кога траеше 4 часа и 47 минути.
Последната се одржа на 17-ти април 2014 година, една седмица по започнувањето на воениот конфликт во русофонскиот исток на соседна Украина, и еден месец откако црноморскиот полуостров Крим со референдум се присоедини кон Руската Федерација, што Западот го смета за нелегално руско анектирање на украинска територија. Таа траеше 3 часа и 5 минути во кои Путин одговори на 81 прашање, од кои 35 беа посветени на Крим и ситуацијата во Украина.
Како што појаснуваат од Кремљ, претседателот претходно не може да знае какви прашања ќе бидат поставувани, но оти Путин обично ги одбира оние кои најмногу ги интересираат руските граѓани но и меѓународната јавност. Потоа бара од министерствата исцрпни информации кои ќе се употребат како одговори на прашањата, а се составува и листа на одговори кои се испраќаат.
„Ова на шефот на државата му овозможува да го опипа пулсот на нацијата – се јасно се гледа со голо око“, нагласи Песков за проблемите кои руските граѓани ги делат со претседателот.
Следете во живо: