Светот ќе добие нов ракометен шампион, откако селекцијата на Франција во полуфиналето на Мундијалот во Катар, го елиминира бранителот на шампионскиот трофеј Шпанија.
Во вториот полуфинален меч на Светското првенство, репрезентацијата на олимпискиот и европски првак Франција во текот на целиот меч беше подобар противник од Шпанија и на крајот заслужено славеше победа со 26:22.
За „Триколорите’’ ова ќе биде шесто финале на Мундијалите, а на досегашните пет Французите дури четирипати успеваа да го освојат шампионскиот трофеј. Доколку тоа им успее уште еднаш тие по втор пат ќе обединат титулите од трите најголеми натпреварувања.
Потсетување дека во првиот полуфинален меч репрезентација на катар ја победи Полска со 31:29, со што Катар влезе во историјата како прва не европска земја која ќе освои медал на Мундијалот.
Така, во финалето на 24тото СП, закажано за во недела, ќе играат домаќинот Катар и Франција (17:15), додека за бронзата ќе се борат Полска и Шпанија (14:30).
Денеска ќе се играат натпреварите за 5. и 7. место, а во нив Хрватска и Данска ќе ги одмерат силите за 5.место, додека Германија и Словенија ќе се борат за седмата позиција во конечниот поредок.
