Заменик-претседателот на Владата, Бујар Османи, денеска учествуваше на 13. состанок на Советот за стабилизација и асоцијација во Брисел. Од страна на Европската комисија беа присутни и високата претставничка и потпретседателка на Европската комисија, Фредерика Могерини, и комесарот за проширување и добрососедска политика, Јоханес Хан.
Османи го образложи планот 3-6-9, и изрази задоволство од поддршката од меѓународните партнери при негово создавање, поддршка која се очекува да продолжи и при неговото имплементирање. Тој ги повтори заложбите на Владата за затворање на сите отворени политички прашања и отстранување на сите пречки за реактивирање на евроинтегративните процеси.
„Сакам да испратам јасна порака дека планот 3-6-9 – ќе биде спроведен. За оваа наша намера постои внатрешен општествен консензус и ние како Влада на тоа се обврзуваме. Веќе се изготвени работни групи, ад-хок тела, како и процедури за мониторирање и рано предупредување на евентуалните застои во имплементацијата на Планот“, рече Османи на денешната прес-конференција по завршувањето на состанокот. Тој додаде дека во истиот контекст Владата веќе ги адресира и отворените политички прашања, како што се односите со соседите, но и донесување на законот за употреба на јазиците.
Во изминативе 30 дена ова е трета посета на вицепремиерот Османи на Брисел, што самото по себе претставува јасен сигнал дека фокусот на новата Влада изминатиов период се евроинтеграциите. „Ние, и како земја и како Влада, очекуваме, согласно успешното адресирање и отстранување на пречките, да добиеме конкретни чекори од страна на Европската Унија, кои јасно би ја рефлектирале визибилноста на европската перспектива на Република Македонија.“ истакна Османи во своето обраќање.