КОМПАНИИ

Горан Марковиќ гостин во подкастот „Бизнис класа“: Телеком инвестира 40 милиони евра годишно во подобрување на мрежата, Скопје е еден од најпокриените градови со оптичка мрежа во Европа

Горан Марковиќ како амбициозен млад човек заминал од Црна Гора и работел на високи менаџерски позиции во Унгарија, Бугарија, Данска и Полска, а дваесет години подоцна доаѓа во Македонија каде што ја извршува функцијата Главен извршен директор на Македонски Телеком. Денес, на прагот на уште едно големо скалило во неговата кариера, во подкастот „Бизнис класа“ тој зборува за плановите и лидерството, развојот на мрежата и вештачката интелигенција, како и за она што ќе го понесе со себе на новата позиција во Бон, која ја презема од следната година.

„Скопје во моментов е еден од најпокриените градови со оптичка мрежа во Европа, со покриеност од 92-3% од целата територија, што е реткост дури и за некои од најголемите градови на континентот. Дополнително, македонскиот пазар беше еден од првите три пазари во рамки на Дојче Телеком кој ја доби иновативната 5G+ мрежа. И тоа се придобивките од еден голем систем како Дојче Телеком – тоа што дури и малите компании кои се дел од големите Групации можат, доколку навистина имаат волја и квалитетен кадар кој тоа може да го спроведе, да добијат пристап до иновации пред големите компании од поголеми земји“, изјави Горан Марковиќ.

Марковиќ додава дека и понатаму гледа простор за дополнителен развој на инфраструктурата во помалите градови и руралните подрачја од земјата, со цел да се обезбеди подобра покриеност и поквалитетна мрежа за корисниците. Тој изјави дека Телеком секоја година инвестира околу 40 милиони евра во подобрување на инфраструктурата и во нова опрема и ќе продолжи да го прави тоа и во иднина.

Неговото ексклузивно гостување во подкастот „Бизнис Класа“ можете да го погледнете на YouTube каналот на Мишко Иванов. Целото видео е на линкот подолу.

Горан Марковиќ од први јануари 2027 година заминува од Македонија во Бон, во седиштето на Дојче Телеком, каде што ќе ја преземе функцијата Виш потпретседател за комерцијален раст за Европа. Новиот професионален предизвик му носи одговорност за комерцијалниот развој на 9 европски пазари, меѓу кои и Македонија.