Еврозоната треба да создаде свој „фонд за црни денови“, кој ќе им помогне на членовите на монетарната унија при идни економски потреси, препорача директорот на Меѓународниот монетарен фонд (ММФ), Кристин Лагард.
Говорејќи во Берлин таа ја забележа одржливата и широката стабилизација на глобалната економија, но истакна дека има други закани – растечкиот популизам и протекционизам, пишува „Ројтерс“.
„Земјите од еврозоната мора да се подготват за понатамошни економски шокови“, рече Лагард. Според неа, монетарната унија треба да ги модернизира своите пазари на капитал и да ја подобри банкарската унија, како и да продолжи по патот кон поголема фискална интеграција.
Директорот на ММФ, исто така, коментираше во германскиот главен град дека во добрите години од економска гледна точка земјите од монетарната унија мора да придонесат во посебен фонд. Треба да се користи за трансфери кога економските проблеми се случуваат само во земји кои се во согласност со фискалните правила и кои ќе ги отплаќаат кредитите со нивните идни придонеси во фондот.
„Таквиот финансиски механизам за поддршка на членовите на еврозоната ќе ги смири инвеститорите“, рече Лагард.
Во однос на капиталните пазари таа смета дека треба да има засилена регулација и надградба на договорите, за да се справи со потенцијалниот прилив на компании за финансиски услуги во континентална Европа по „Brexit“. Лагард, исто така, го истакна напредокот на ЕУ во банкарската унија.
„Договорот за гаранција на глобалните депозити, заедно со патоказот за намалување на ранливоста на банкарскиот сектор, ќе биде уште поголем чекор во вистинска насока“, додаде таа.
