Министерот за животна средина и просторно планирање во Владата на Македонија Нурхан Изаири и градоначалникот на Дебар Ружди Лата во средата присуствуваа на почетокот на градежните работи за изградба на канализацијата за атмосферски води на централниот дел на Дебар.
Министерот Изаири нагласи дека ова е значаен проект за Дебар во кој заедно учествуваат централната и локалната власт.
„Во Дебар ќе реализираме и други проекти во сферата на екологијата“, додаде Изаири.
Градоначалникот на Дебар Ружди Лата нагласи дека дефинитивно овој дел од градот ќе ги надмине големите проблеми со атмосферските води. Проектот е многу значаен за Дебар, рече тој и додаде дека станува збор за канализација долга 780 метри на улиците „8 септември“ и „Братство Единство“.
Инаку проектот чини 7,1 милион денари од кои 50 отсто се на централната додека 50 отсто на локалната власт.
Градоначалникот Лата и министерот Изаири потоа имаа средба на која дебарскиот градоначалник го информираше министерот за севкупната состојба во сферата на екологијата и притоа побара од Лата да се превземаат сите мерки за заштита на регионот од еколошки проблеми.
