Во мултимедијалниот културен центар „Матица екслузив“, денес, ќе биде промовирана книгата „Балканска психологија – државници и марионети“ од проф.д-р Стефан Влахов Мицов, издание на „Матица македонска“ од Скопје.
За најновото дело на познатиот научник, публицист, историчар и книжевен критичар ќе говорат писателот Ефтим Клетников и Драгица Поповска.
Стефан Влахов Мицов е автор на дваесет книги од областа на филозофијата, историјата, книжевната критика и есеистика. На македонски јазик ги објавил делата: Филозофскиот клуч за македонскиот идентитет, Вируси за поматени мозоци, Хероите и потомците, Македонската еманципација на Балканот, Филозофија на балканскиот пекол и Држава како се гради и брани.