Повеќето инвеститори се добро запознаени со земјите од „МИНТ“ (Мексико, Индонезија, Нигерија и Турција) и „БРИКС“ (Бразил, Русија, Индија, Кина и Јужна Африка). Тоа се пазари со брзо растечки економии, а инвеститорите очекуваат овие земји да се „мотор“ на глобалниот економски раст како во моментов, така и во иднина, коментира „Visual Capitalist“.
Aнализата подготвена од „Boston Consulting Group“, покажува дека околу 52% од целиот светски економски раст меѓу 2014-та и 2016-та година може да биде оддаден на Кина и САД. Иако економијата на Кина веројатно навистина се забавува, а американскиот економски раст не е како што беше, овие две економии остануваат лидери поради големината и влијанието.
Всушност, се чини дека само 16 земји во светот придонесуваат со 1% или повеќе за растот како целина. Сите останати земји во светот вкупно формираат само 18,5% од вкупниот раст.
Земјите од „МИНТ“ се дел од табелата на „Visual Capitalist“, така што Мексико придонесува со 1,6%, Индонезија – со 2,2%, Нигерија – со 1,3% и Турција – со 1,2% за светскиот економски раст.
Ситуацијата кај земјите од „БРИКС“ сепак е малку поинаква. Додека Кина (30,3%) и Индија (6,5%) заземаат значителен простор во графиконот, останатите земји виделе и подобри времиња.
Русија доживува особено сериозни потешкотии по падот на цените на нафтата, а земјата всушност има негативен ефект врз растот на светската економија од -1,3% во 2016-та година. Бразил реално придонесува со 0,0% за светскиот економски раст, т.е. во моментов не се зема во предвид никакво влијание.
