„FIAT“ ги објави фотографиите и техничките детали од својот нов „роудстер“ кој настана во соработка со „Mazdа“.
Новиот „124 Spider“ може да се опише како автомобил кој во себе ја соединува јапонската сигурност со спортско „срце“ на еден „Abarth“.
Иако е заснован на новата „Mazdа MX-5“, италијанскиот двојник значително се разликува според дизајнот на надворешноста, чија инспирација треба да се бара во оргиналниот „FIAT 124 Spider“ од 60-тите.
Влијанието на постариот модел е видлив најпрво во заоблените „LED“ дневни светла и формата на маската на ладилникот.
Од друга страна, ентериерот е практично прекопиран од „Mazdа“, a тоа дека се возите во „FIAT“ ве потсетува единствено амблемот на воланот.
Од „MX-5“ е превземен дури и мултимедијалниот систем, кој за потребите на италијанскиот модел ја доби ознаката „FIAT Connect 7.0“.
Под хаубата се наоѓа четирицилиндарскиот 1.4-литарски „Abarth“ турбо бензинец со 160 ks (119 kW) и 249 Nm, што значи дека „124 Spider“ располага со иста моќ како и помоќната верзија на „Mazdа MX-5“, но „FIAT“ има за 50-тина Nm поголем максимален вртежен момент.
Моторот е поврзан со шестстепен мануелен или изборен автоматски менувач со ист број на брзини.
Од „FIAT“ очекуваат дека „124 Spider“ ќе им ја подобри продажбата во САД (поради што и дизајнот на екстериерот е „американски“), па од маркетиншки причини за тамошните купувачи е подготвена ограничена серија од 124 примероци кои ќе ја имаат ознаката „Prima Edizione Lusso“.
Секој автомобил ќе биде нумериран, а ќе се продава исклучиво во сина „Azzurro Italia“ боја на каросеријата, додека седиштата и ентериерот ќе бидат „Saddle“ светло кафена боја.
По светската премиера на авто-саемот во Лос Анџелес, „FIAT 124 Spider“ на американскиот пазар ќе пристигне во текот на летото 2016-та.
Што се однесува до европската верзија, таа би требало да биде претставена на саемот за автомобили во Женева во март 2016-та година.