Телекомуникациската компанија „Liberty Global“ на Џон Мелоун го договорила купувањето на „Cable & Wireless Communications“ за сума од 5,4 милијарди фунти во акции и готовина. Договорот ќе му овозможи на американскиот милијардер да го прошири значително бизнис во Латинска Америка, соопшти „Reuters“.
Сумата за трансакцијата, одобрена од одборот на „Cable & Wireless Communications“ (CWC), е за 49,7% над цената на акциите на компанијата пред објавувањето на преговорите.
Така според договорената зделка вредноста на капиталот изнесува 3,6 милијарди фунти со долг од уште 1,8 милијарди фунти.
Со купувањето на „CWC“ се става крај на една од најстарите британски компании на берзите.
Приказната на „CWC“ започнува уште со најраните телеграфски услуги на Карибите и Латинска Америка во 70-тите години од 19-ти век. Компанијата сега нуди мобилни, фиксни, интернет и ТВ услуги во регионот.
Според аналитичарите е малку веројатно зделката да пропадне во предвид поддршката на Џон Мелоун, најголемиот акционер во „Liberty Global“ кој поседува и 13% од „CWC“ по купувањето од 3,3 милијарди фунти на „Columbus International“ во март оваа година.
Двајцата поранешни извршни директори на „Columbus“ поседуваат 23% од акциите на „CWC“. Тие сепак ќе ја поддржат продажбата на компанијата на „Liberty“.
„Liberty“ ќе може да го обедини бизнисот на „CWC“ во Панама и Карибите со латиноамериканските операции во Порторико и Чиле, создавајќи поголема компанија, способна да се натпреварува со локални ривали како „Digicel“, „Telefonica“ и „America Movil“.
Бизнисот на „CWC“ ќе се спои со активностите на „Liberty“ во Латинска Америка, која е наведена како посебна компанија со името „LiLac“ на берзата во САД и има пазарна вредност од 1,65 милијарди долари и нето долг од 2 милијарди долари.
