Списанието „Forbes“ неодамна објави листа со спортистите кои заработија најмногу во последниве 10 години.
Во рангирањето земаат учество спортисти кои се активни во голем дел од изминатата деценија, што е и причината за отсуството на Мајкл Џордан од неа.
Спортистот кој најмногу заработи во последните 10 години е голферот Тајгер Вудс, а на неговото конто има 845 милиони долари. Неговите приходи од почетокот на неговата професионална кариера изнесуваат 1.4 милијарди долари.
Втората позиција е за боксер Флојд Мејведер со 660 милиони долари, а трет е кошаркарот Коби Брајант со 475 милиони долари. Мејведер веќе објави откажување од професионалниот спорт, додека Брајант е во последната сезона од договорот со Лос Анџелес Лејкерс.
Друг кошаркар – Леброн Џејмс, е на четвртата позиција со 472 милиони долари, откако го замени голферот Фил Микелсон, кој заработи 4 милиони долари помалку. Шестти во рангирањето е ѕвездата од машкиот тенис во изминатата деценија – Роџер Федерер со 455 милиони долари, следен од Дејвид Бекам со 441 милиони долари.
Боксерот Мани Пакјао (432 милиони долари) и двајцата најдобри фудбалери денес, Кристијано Роналдо (407 милиони долари) и Лионел Меси (350 милиони долари) ја дополнуваат топ 10 листата.
Тенисерката Марија Шарапова е единствената жена во листата со 250 милиони долари, кои беа доволни таа да ја заземе 18-та позиција.
