Глобалната побарувачка за злато порасна во третиот квартал во најголем дел благодарение на скокот на купувањето на овој скапоцен метал во САД, во време кога инвеститорите го користат падот на цените, соопшти вчера Светскиот совет за злато (WGC).
Вкупната побарувачка за злато во три месеци заклучно со септември изнесувала 1,121 тони, осум проценти повеќе во однос на истиот период во 2014 година, наведува WGC, пренесува агенцијата Ројтерс.
„Кина и Индија и понатака се доминантни на глобалниот пазар за злато и од тие две земји дошле близу 45 проценти од вкупната побарувачка, но она што е карактеристично за извештајниот квартал е што ширум светот е забележана реакцијата на купувачите на падот на цените“, изјави претседателот на секоторт на WGC за развој на пазарите Алистар Хјуит.
Според него, најдраматичен скок на побарувачка за златни плочки и златни монети е забележана во САД, каде побарувачката била највисока во последните пет години и изнесувала 33 тони. Побарувачката за накит исто така пораснала и тоа за шест проценти, во кварталот кој традиционално се карактеризира со низок интерес, додава Хјуит.
Цената на златото во јули паднала на најниското ниво во последните пет години од 1.072,35 долари за унца. По растот од претходните недели, цената вчера повторно падна на ниво приближно на она од јули од 1.074,08 долари. WGC напоменува дека голем дел од побарувачката за злато и понатака доаѓа од централните банки ширум светот, бидејќи златото се смета за сигурна инвестиција во време на економски тешкотии.
