Компанијата „АвтоВАЗ“ официјално го покажа теренцот „Lada XRay“. Сериското производство на моделот стартува на 15-ти декември во Тољати, а старот на продажбата е планиран за февруари 2016-та година.
Во основата на автомобилот е платформата „B0“ на која се изградени „Renault Sandero Stepway“ и „Renault Logan“. Во дизајнот на моделот учествувале инженери од Алијансата „Renault-Nissan“ и од автомобилскиот завод Волжскија. Според претставници на „АвтоВАЗ“ во конструкцијата на „Lada XRay“ има над 500 оригинални детали, создадени специјално за него.
Димензиите на моделот се должина од 4164 мм, ширина од 1764 мм и висина од 1570 мм. Растојанието помеѓу двете оски е 2592 мм. Багажниот простор има капацитет од 376 литри, а со отстранување на седишта, овој обем се зголемува до 1382 литри.
Автомобилот ќе биде опремен со два бензински мотори со зафатнина од 1,6 литри со моќност од 106 и 114 КС, како и со 1,8-литарски, исто така бензински, чија моќност е 123 КС. Трите мотори можат да бидат во комбинација со рачен менувач со 5 и 6 брзини, како и со автоматска трансмисија. Најмоќна верзија ќе забрзува од 0 до 100 км/ч за 10,2 секунди, онаа со 114 КС за 10,3 секунди, а верзијата со 106 КС за 11,9 секунди.
Во опремата на хечбекот се вклучени системите „ABS“, „ESP“, воздушни перничиња, предни светла за магла, загревање на предните седишта и предни електрични стакла. Во понудата ќе бидат и сензор кој го покажува притисокот во гумите, камера за рикверц, како и информациско-забавен систем со 8-инчен дисплеј.
Цените на „Lada XRay“ ќе станат познати при стартот на продажбата, а се очекува основната верзија да стартува од малку над 10.000 долари.
