Пратениците по два дена расправа во четвртокот попладнето го изгласаа Законот за задолжување на Република Македонија кај „Дојче банка“ и „Ерсте банка“ по Договорот за заем за финансирање на проектот „Гасификација на Република Македонија – фаза 1 – делница Штип – Неготино – Битола и делница Скопје – Тетово – Гостивар“, по скратена постапка.
Со овој предлог треба да се обезбедат 90 милиони евра преку заем за финансирање на градбата на госоводот – делница Штип блок станица 5 Неготино – Битола и делница Скопје – Тетово – Гостивар. Рок на отплата на кредитите е седум години со вклучен грејс период од три години, со каматна стапка која ќе се пресметува како збир од 6м ЕУРИБОР + маргина од 450бпс.
Проектот предвидува изградба на инфраструктурни објекти и линиски дел на делниците Штип – Неготино – Битола дел 1 од Штип блок станица 5 до Неготино, линиски дел во должина од 36 километри, кој ќе се надоврзе до делницата Клечовце – Штип блок станица 5 чија изградба која е веќе во тек и дел 2 од Неготино до Битола во должина од 92 километри. Исто така и вториот дел Скопје – Тетово во должина од 76 километри. Изградбата се очекува да заврши во 2016 година.
Пратениците од владејачкото мнозинството го оценија предлог-законот како позитивно решение со кое ќе се реализира стратешки проект Пратениците од опозицијата, кои не го поддржаа нацртот сметаат дека тоа претставува бово задолжување и побараа проектот да биде реализиран од постојниот Буџет.