Концерт на големиот виолинист Максим Федотов, заедно со симфонискиот оркестар на ФМУ – Скопје, ќе се одржи на 4-ти ноември, во Македонска опера и балет, во 20 часот.
Скопје Класик повторно најавува спектакуларен концерт на уште еден извонреден музичар. По Александар Гидин во 2013-та година и Кирил Трусов во 2014-та, оваа година публиката ќе има можност да слушне уште еден светски признаен изведувач – реномираниот руски виолинист и диригент Максим Федотов. Тој, заедно со симфонискиот оркестар на ФМУ и маестро Саша Николовски-Ѓумар, ќе одржи концерт кој со сигурност нема никого да остави рамнодушен.
Максим Федотов е еден од најистакнатите руски музичари на денешнината. Рускиот „Паганини“, како што го нарекува светската критика, се школувал на Московскиот конзерваториум, а неговите професори биле истакнати изведувачи и педагози Борис Сергеев, Игор Безродниј, Владислав Чернушенко. Во текот на својата кариера настапувал на најпрестижните сцени во Русија, Англија, Германија, Финска, Австрија, Шпанија, Јапонија, Италија и други, а соработувал и со бројни реномирани оркестри и уметници во Русија и надвор од неа. Максим Федотов добро и‘ е познат на македонската публика со своите врвни рецитали на фестивалот „Охридско лето“. Паралелно со исклучителната концертна активност се одвива и неговата диригентска дејност. Од 2003-та до 2005-та година Максим Федотов бил шеф-диригент на Рускиот симфониски оркестар, а од 2006-та до 2010-та се наоѓа на местото уметнички директор и шеф-диригент на Московскиот симфониски оркестар. Максим Федотов е добитник на повеќе национални и меѓународни награди.
Симфонискиот оркестар на ФМУ – Скопје го сочинуваат студенти на додипломски и последипломски студии од оваа високообразовна институција. Низ своето досегашно постоење оркестарот бележи постојан квалитативен растеж соработувајќи со голем број уметници од Македонија и странство. Секоја година симфонискиот оркестар на ФМУ одржува повеќе концерти на кои изведува голем број капитални дела од светскиот симфониски репертоар. Покрај тоа, оркестарот е еден од значајните промотори на македонската симфониска музика.
Концертот ќе се одржи во Македонската опера и балет, со почеток во 20 часот, а на програмата се дела од Бетовен, Чајковски и Сен-Санс. Својот висок изведувачки потенцијал Федотов ќе има можност да го покаже во Концертот за виолина и оркестар на рускиот композитор Петар Илич Чајковски, а позади диригентскиот пулт ќе го видиме во познатата Увертира „Кориолан“ на Лудвиг ван Бетовен. На концертот публиката ќе има можност да го чуе и делото „Introduction et rondo capriccioso“ на Камиј Сен-Санс. Билетите се достапни во билетарницата на МОБ.
