Кредиторите во сенка, како инвестициските фондови, водат кога станува збор за зголемувањето на финансискиот имот во еврозоната, покажува најновиот извештај на Европската централна банка (ЕЦБ).
Една од причините е што традиционалните банки по финансиската криза се посветија на крпење на билансите.
„Изминатите неколку години, растот на вкупниот финансиски имот во еврозоната го придвижуваа главно небанкарските финансиски ентитети, а вкупниот имот во банкарскиот сектор закрепна на ниво, кое последен пат е видено во 2008 година“, се констатира во извештајот на ЕЦБ, пренесува агенцијата Ројтерс.
Неконвенционалните кредитори опфаќаат инвестициски фондови на пазарот на пари, како и останатите видови небанкарски финансиери. Минатата година нивниот финансиски имот во еврозоната достигна вредност од 23.000 милијарди евра, што е 38 проценти од вкупниот финансиски имот во зоната на единствената европска валута и претставува значителен скок во однос на 33-процентниот од 2009 година.
Во истиот период, уделот на кредитните институции во финансискиот имот на еврозоната опадна од 55 на 48 отсто.
„Банкарскиот сектор во сенка е се поважен извор на финансирање во економијата на еврозоната. Ентитетите во нестандардниот кредитен сектор имаат исто така важна и се позначајна улога во небанкарското кредитно посредување и исто така се важни добавувачи на банкарското финансирање“, се заклучува во извештајот.
