Цената на сировата нафта се задржа во четвртокот на светските берзи над 49 долари откако вниманието на инвеститорите беше пренасочено од залихите во САД на послабиот раст на најголемата светска економија во третиот квартал.
На лондонската берза цената на барелот остана речиси непроменета во однос на претходното затворање и изнесуваше 49,03 долари. На американската берза со барелот се тргува по 36 центи повисока цена, од 46,30 долари.
Вчера цената на нафтата скокна при крајот на тргувањето, што трговците го поврзаа со падот на залихите во клучниот американски јазол Кушинг и намалените залихи на бензин.
Денеска противтежа на извештајот беше податокот за осетно намалениот раст на американската економија во третиот квартал, за 1,5 отсто на годишно ниво, во споредба со 3,9 отсто забележани во претходниот квартал.
Аналитичарите напоменуваат дека солидната домашна побарувачка на крајот на годината сепак би можела да ја поттикне американската централна банка да ја крена клучната каматна стапка во декември, што би поттикнало раст на доларот.
