Актерот Петар Темелковски во среда во кино Мис Стон во Прилеп ќе ја изведе монодрамата „Јане Сандански 100 години после“.
Гостувањето во Прилеп со монодрамата е затоа што Темелковски вели дека сака прилепската публика да ја види претставата која е посветена на Сандански, кој загина точно пред 100 години во 1915 година, предаден и убиен на пат кон Неврокоп.
„Поводот што се зафатив со монодрамата за Јане Сандански е годишнината од неговото подмолно убиство. Од архивските материјали што ги имав на располагање за подготовка на претставата видов дека станува збор за многу маркантна фигура на македонското национално и револуционерно дело“, вели актерот Петар Темелковски
Монодрамата се однесува само на периодот од поделбата на Македонија до смртта на Сандански и не претставува само сувопарна хронологија на историски настани затоа што актерот во неа внел свои коментари поради кои добива емотивен пристап и поетична димензија.
Покрај улогите во многу македонски театарски претстави и филмови, Темелковски, кој е уметнички директор на МТФ,,Војдан Чернодрински,, во Прилеп, до сега има изведено и повеќе монодрами со адаптирани текстови од Никола Јонков Вапцаров, Кочо Рацин, Видое Подгорец, Славко Јаневски, Јордан Плевнеш, како и монодрами кои биле посветени на личности како Филип Втори, Свети Апостол Павле и Јустинијан Први.
„Се чувстував повикан да работам монодрами и тоа повеќе со национална тематика, историска содржина и моќна порака за разбудување на националните чувства за Македонците да разберат колкава била цената за нашата слобода која и денес упорно некој сака да ни ја узурпира“,вели Темелковски.
