Издавачката куќа „Антолог“ од Скопје го најавува настанот „Македонска поддршка“ во рамките на „BookStar“, првиот фестивал на европската литература во Македонија, на кој денеска во 20 часот, во фоајето на киното „Фросина“, ќе биде промовирана поетската збирка „Зборовите немаат значење“ на Биљана Стојановска.
„Зборовите немаат значење“ е дебитантската книга на младата поетеса и новинарка Биљана Стојановска. Промотивна реч на настанот ќе одржи писателот Никола Маџиров, кој е еден од рецензентите на книгата. Делови од поезијата ќе читаат писателите Владимир Мартиновски, Ѓоко Здравески, Ана Голејшка и Николина Андова-Шопова, а за музичкиот дел е задолжен Јаков Дренковски.
За поезијата на Биљана Стојановска рецензентот Никола Маџиров забележува: „Поезијата на Биљана Стојановска е длабок допир со ритуалноста на денот. Обичноста на објектите и нивната конкретна и вербална поврзаност со мигот и со телото на оној што пишува го исцртуваат топлиот амбиент на присуството на една широка љубов – љубов што живее во делбата пред да стане разделба и во припомнувањето пред да стане помнење“.
„Треба да се има луцидност да се созерцне во секојдневјето, кое по својата природа е банално, и од него да се создаде мудрост. Кога би се барало од мене со една реченица да ја опишам книгата „Зборовите немаат значење“ од Биљана Стојановска, тоа би била мојата реченица. Пред вас имате сериозна книга од млад автор што многу ветува. Ваквите книги се вистинска реткост во македонската книжевна продукција“, вели во својата рецензија Ѓоко Здравески.
Присутните на промоцијата ќе имаат можност да ја запознаат авторката одблиску и да добијат потписи на книгите, кои на овој настан ќе се продаваат по промотивна цена.
Фестивалот „Букстар“ е поддржан од програмата „Културни приказни“ и од Европската Унија. Логистичката поддршка е на МКЦ.
