Рускиот гасен гигант Газпром извезол во третото тромесечје во Европа и Турција 41,4 милијарди кубни метри гас, што е 23 отсто повеќе од истиот период лани, изјави во петок првиот човек на компанијата Алексеј Милер.
Само во септември биле извезени 13,2 милијарди кубни метри гас, 24 отсто повеќе од истиот месец минатата година.
Европските потрошувачи на руски гас го засилиле купувањето на овој енергенс пред зимата, како и по падот на цената на гасот што го следи и падот на цената на нафтата, но со растојание од шест до девет месеци.
Според зборовите на Милер, Германија, најголемиот купувач на руски гас, ги зголемила купувањата во третото тромесечје за 19 отсто, на 11,2 милијарди кубни метри, а Италија за дури 69 отсто, на седум милијарди кубни метри.
