Доколку блокадата на граничните премини со Хрватска не биде укината, Србија, Македонија и БиХ ќе побараат итна седница на Комитетот на ЦЕФТА, со цел од останатите членки да побараат единствен настап и мерки кон Хрватска.
Ова во петокот изутрината во телефонски разговор го договориле српскиот вицепремиер и министер за трговија Расим Љаиќ, босанскиот вицепремиер и министер за трговија и економски односи, Мирко Шаровиќ и заменикот министер за економија на Македонија, Христијан Делев.
Тие, како што пренесе Танјуг, разговарале за заеднички настап на трите држави кон блокадата на друмскиот и товарен сообраќа кои со денови ги спроведуваат хрватските власти на граничниот премин Батровци-Бајаково.
Љаиќ, Шаровиќ и Делев се согласиле дека е неопходно Хрватска што поитно да го одблокира преминот Батровци – Бајаково за целокупниот сообраќај, бидејќи покрај Србија, и БиХ и Македонија, голем дел од својот товарен сообраќај го вршат преку овој транзите коридор.
Љаиќ изутрината се состанал и со турскиот амбасадор, Мехмед Кемал Бозај, кој изразил загриженост поради повеќедневата блокада од страна на Хрватска, со оглед дека во колоната долга 20 километри има голем број на турски камиони.
