Цената на нафтата се задржа денеска на светските берзи над ниво од 48 долари со оглед дека инвеститорите не се сигурни дали светската побарувачка ќе биде доволно силна да го апсорбира вишокот во снабдувањето.
На лондонската берза цената на барелот за испорака во ноември падна за 68 центи или за 1,4 отсто во однос на претходното затворање и изнесуваше 48,24 долари. Вчера го заклучи тргувањето во плус за 3,1 отсто. На американската берза со барелот се тргува по 1,17 долари пониска цена, од 45,79 долари. Вчера тргувањето го заврши во плус од 4,5 отсто.
Силни осцилации на нафтените пазари се главна карактеристика оваа недела. Така вчера цената скокна под влијание на сигналите за намалување на американските залихи и производство од шкрилци. Денеска повторно цените тргнаа во надолна линија бидејќи фокусот одново се пренасочи кон неизвесните изгледи за побарувачката во прв ред на Кина.
„Секако дека ништо не е сигурно. Само тоа можеме со сигурност да го кажеме. Се чини дека ниските цени конечно почнаа да го земаат данокот на американското производство“, вели Томас Пју од Capital Economics.
Сигналите за намалено американско производство, пред се во помалиот број на активни ископини, ја поттикнаа Меѓународната агенција за енергетика (IEA) за следната година да најави можно намалување на производството на нафта за половина милион барел дневно.
