Советници во Советот на Град Скопје, вработени во градската администрација и јавните градски претпријатија, претставници на невладини организации, граѓани и ученици во средните училишта на Град Скопје денеска се вклучија во акција за расчистување и уредување на Парк-шумата „Водно“.
Акцијата со мото „Скопје дише со Водно“ е дел од активностите на шестиот ден од „Европската недела на мобилност 2015“.
Учесниците во акцијата ги расчистуваа расфрланите отпадоци околу паркинзите на Средно Водно, на патот кон Нерези, на локалитетот Марково Крувче, на врвот на Водно и по падините на планината, а вработените во ЈП „Паркови и зеленило“ ја косеа тревата, ги поткаструваа гранките на дрвјата и го уредуваа зеленилото.