Новата академска 2015/2016 година почнува во вторник на државните универзитети во Република Македонија.
Најавено е дека на првиот академски час на факултетите ќе присуствуваат ректорите на универзитетите, како и претставници на Министерството за образование и наука.
На првиот академски час на на Државниот универзитет во Тетово ќе присуствува министерот за образование и наука Абдилаќим Адеми и ректорот Вулнет Амети, на Штипскиот универзитет „Гоце Делчев“ свеченоста за студентите од Медицинскиот, Правниот и од трите академии ќе биде организирана во Мултимедијалниот центар на Економскиот факултет, каде ќе се обратат заменик-министерот за образование и наука Спиро Ристовски и новиот ректор Блажо Боев.
На Универзитетот „Св. Кирил и Методиј“ бруцошите ќе ги поздрави ректорот Велимир Стојковски, додека на битолскиот Универзитет „Св. Климент Охридски“ новоименуваниот ректор Сашо Коруновски ќе се обрати пред студентите на Техничкиот факултет.
