Во книжарницата Reader’s Feast во австралиската метропола Мелбурн, во саботата се одржа промоција на романот „Акчилница“ од македонската писателка Вера Бужаровска, во англиски превод на Пол Филев, а во издание на издавачката куќа „Сагуаро Прес“.
На промоцијата настапи Македонскиот женски хор на Австралија, а за романот зборуваа Пол Филев, Џим Хлавач и Румена Бужаровска.
„Овој моќен автобиографски роман од пораното творештво на Вера Бужаровска го опфаќа нејзиното детство во Битола на почетокот од Втората светска војна, а ги тематизира класните разлики и етничката шареноликост на градот пред депортацијата на Евреите низ призмата на единаесетгодишно девојче“, рече Филев на промоцијата.
Вера Бужаровска (1931–2013) е авторка на повеќе од четириесет прозни и поетски дела, а објавувала и детска литература.
Пол Филев е преведувач, уредник и блогер од Мелбурн. Преведува од македонски, шпански и англиски јазик.