Американската компанија „Monsanto“ ја зголеми својата понуда за купување на швајцарскиот конкурент „Syngenta“, оценувајќи ја компанијата на околу 47 милијарди долари, наведува извор кој е запознаен со ова прашање.
„Monsanto“ која сака да ги обедини своите бизнис со семиња и пестициди со тој на „Syngenta“, ја зголеми својата понуда до 470 швајцарски франци (501,98 долари) за акција од 449 франци за акција, колку што предлагаше досега, пренесува „CNBC“.
Зголемената понуда има за цел да стави крај на ќор-сокакот во преговорите меѓу двете компании. „Syngenta“ го отфрли претходниот предлог во април и одби да се спои со својот ривал.
Некои врвни инвеститори ја притискаат „Syngenta“ да седне на преговарачка маса со „Monsanto“ и да побара подобра понуда.
Седрик Локе, виш инвестициски менаџер во „Pictet Asset Management“, посочи пред „Ројтерс“ претходно во оваа година дека трансакцијата може да се случи при цена од најмалку 500 швајцарски франци за акција.
Истражувањето на „Sanford C. Bernstein“ меѓу речиси 100 поранешни и сегашни инвеститори на „Syngenta“ објавено претходно овој месец, покажа дека околу 92% ја поддржуваат ваквата зделка. Просечната цена која се смета за прифатлива меѓу инвеститорите е 473 швајцарски франци.
Претставник на „Syngenta“, најголемиот производител на земјоделски пестициди во светот, за „Ројтерс“ изјави во понеделникот: „Немам коментар“. Слична реакција имаше и од портпаролот на „Monsanto“.
